البورصة المصرية مؤشراتها انهاردة 23 سبتمبر نزلت ، وخسرت حوالي 8.2 مليار جنيه ، بس ياترى الخسارة دي أسبابها أيه وهل هي خسارة فعلا ؟

السبب الرئيسي للخسارة ديه هي عمليات البيع اللي قام بيها الأجانب في أسهم البورصة بسبب حجات كتير ومنها الأحداث اللي حصلت في السعودية الأسبوع اللي فات وتفجير بعض المنشآت النفطية التابعة لشركة أرامكو، واللي الطبيعي أثر شوية على الاقتصاد العالمي لان الشركةديه هي أكبر شركة نفط في العالم، وعشان كده القلق اللي جيه للمستثمرين وخاصة الأجانب أن أسهم البورصة تنزل خلاهم يقوموا بعمليات بيع كبيرة للأسهم اللي بيملكوها وبالتالي أسعار الأسهم انخفضت، لأن في البورصة كل ما البيع بيزيد الأسعار بتنزل، وانهاردة فعلا الشركات الأجنبية باعت أسهم في البورصة باكتر من211 مليون جنيه، ده غير الأسهم اللي اتباعت من الأفراد.

وعشان تبقي عارف مافيش حاجة أسمها خسارة البورصة ده مبلغ تقديري بيتحسب على إجمالي حركة البيع والشراء اللي بيتم على كل الأسهم وحجم الزيادة والنقصان في سعر الأسهم عن الأسبوع اللي قبلو والي هو رأس المال السوقي بتتصنف على أنها مكسب أو خسارة، وانهاردة قيمة رأس المال السوق وصل إلى 694.1 مليار جنيه.

وفي الأسبوع اللي فات مؤشر البورصة إيجي أكس 30 انخفض بحوالي 1.47 %، والمؤشر ده متسجلة فيه أكبر 30 شركة من حيث القيمة السوقية في البورصة واللي بيتحدد عليها بشكل رئيسي مدي خسارة أو أرباح البورصة، وكمان نفس الوقت ده مؤشر إيجي أكس 70 قل بحوالي1.79 % ومؤشر إيجي أكس 100 نزل بحوالي 1.72%.

إقرأ أيضًا

البورصة المصرية تواصل الخسائر لليوم الثاني على التوالي