مفأجاة الحكومة لتخفيض أسعار الذهب في مصر | يلا بيزنس

مفأجاة الحكومة لتخفيض أسعار الذهب في مصر

يا دبلة الخطولة عقبالنا كلنا.. الأغنية ديه بيستناها شباب كتير بينا وأهالي كتير عشان يفرحوا بولادهم، وعشان في الفترة الأخيرة أسعار الذهب ولعت والشبكة بقت نار قرروا ميستنوش تاني ، ولكن اللي متعرفوش أن الحكومة بتحضر لمفاجأة هتقلل من أسعار الذهب في مصر.

ولازم الأول تعرف أن من ضمن أسباب ارتفاع الذهب غير طبعا الأسعار العالمية ، ولكن أحنا عندنا نقص كبير في الإنتاج ، وده في الوقت اللي ناس كتيرة بدأت تشتري الذهب وتستثمر فلوسها فيها بعد ما فوائد البنوك انخفضت.

المفأجاة بقى أن الحكومة شغالة بتبني أول مدينة للذهب في مصر هتكون مختصة في تشغيل وصناعة المشغولات الذهبية وكمان هتقوم بالتصدير للخارج.

والمدينة ديه هتساعد مع المصنع الجديد اللي عملته الحكومة من حوالي 4 سنين لتصنيع عيار 18 و 21 أنها تضاعف صادراتنا من الذهب واللي آخر إحصائيات قالت اننا بنصدر بحوالي 1.8 مليار دولار سنويا ذهب خام، وخاصة أن موقعها في محور قناة السويس هتخلي مستثمرين كتير عنيهم عليها لأن المنطقة ديه هتكون واخدة مزايا استثمارية كتيرجدا وهتبقى قريبة من موانيء التصدير.

وعشان تبقى عارف فمصر فيها ذهب كتيرجدا، وآخر دراسات أثبتت أن 94 % من مساحة مصر غنية بالثروات المعدنية وأن فيه أكتر من 39 خامة من المعادن متوافرة في مصر، وبالنسبة للذهب فيه أكتر من 120 منجم غير مستغل ممكن ينتجوا حوالي 300 طن ذهب، ولكن الحكومة بتعتمد بشكل رئيسي على منجم السكري واللي تم اكتشافه سنة 1995 في الصحراء الشرقية.

ولما فعلا يتم استغلال المناجم ديه ويتصنع الذهب في مصر هيساعد الأسعار انها هترخص، ولو فكرت أن أسعار الذهب مرتبطة بأسعاره العالمية متنساش أن فرق العملة الكبير وتكاليف الإستيراد لوحدها بتعلى من سعر الجرام بشكل مبالغ، وكمان قلة المعروض من الذهب بتساهم في الارتفاع ده.

واللي بتعمله الدولة ده مش هيفيد الأسعار ويقللها بس ولكن هيساعد أنه يزود من مساهمة الثروة المعدنية بحوالي 5% في الناتج المحلي الإجمالي على سنة 2024 زي ما الدولة عاوزة ، ده غير أنه هيحقق الخطة الحكومية اللي بتستهدف أنها تعلى مركز مصر بين الدولة المنتجة للذهب واللي هي حاليا بتحتل المركز 37 بينهم.

إقرأ أيضًا

إيه فوائد عداد الكهرباء الذكي ؟

اترك رد

لن يتم نشر عنوان بريدك الإلكتروني.