الحكومة هتساعد الشباب بخريطة الاستثمار الصناعي إزاي؟
الحكومة | عاوز تعمل مشروع وخايف أن فكرتك تفشل وتحويشة العمر تضيع أو معندكش فكرة أصلا عشان تنفذها.. ده مشكلة كتير وخاصة الشباب بيعانوا منها وخوفهم أنهم يخسروا بتخليهم يبعدوا عن أنهم يعملوا مشاريع أصلا ، وعشان كده وزارة الصناعة أطلقت من كام يوم البوابة الحكومية لخريطة الاستثمار الصناعي في مصر واللي هتشجع الشباب ، طيب هي أي الخريطة ديه ؟
الفرص المتاحة
وزارة الصناعة لما شافت أن كتير معندهمش علم بالفرص المتاحة للاسثتمار في البلد جمعت كل المشاريع الصناعية المختلفة اللي ممكن تتعمل في محافظات مصر وعلمتلها موقع على الإنترنت بدراسات جدوي مبدئية عشان أي حد بيفكر يعمل مشروع يقدر يدور على المناسب ليه.
والمشاريع ديه عددها ميقلش 1325 في 8 قطاعات زي ما حددتهم وزارة الصناعة وهما استغلال المناجم والمحاجر وتصنيع الورق والطباعة والنشر والصناعات الدوائية وصانعة الالكترونيات و الغزل والنسيج و الملابس و الجلود ، ده غير صناعة الكيماويات ومنتجاتها والصناعات المعدنية والمواد الغذائية والمشروبات والتبغ.
خريطة الاستثمار
فمثلا محافظة زي القاهرة فنصيبها في خريطة الاستثمار الصناعي 55 مشروع في مجالات كتير زي تصنيع رادياتير السيارات ومصانع لفرم النفايات وأخر لتصنيع كشافات الإضاءة الليد ، وكل اللي هيبقي مطلوب منك أنك تدخل على موقع خريطة الاستثمار الصناعي www.invegypt.com وبعد كده تختار المحافظة اللي عاوزة تستثمر فيها والنشاط اللي بتفكر فيه وهيطلعلك هل فيه فرص متاحة ولا لا وايه مكان المشروع المتاح ودراسات جدوي مبدئية .
وكمان الموضوع مش هيبقي مجرد فرصة بس ولكن الحكومة هتجهز كل حاجة للمستثمر وده عن طريق مبادرة طرحتها من فترة أسمها مصنعك جاهز بالترخيص ، واللي هيوفر على المستثمر أنه يروح عشان يطلع تراخيص ويضيع وقت كتيرعليه ، ده غير أن اللي مش عاوز يستفيد بالمباردة ديه ممكن يأخد ترخيص المصنع بالأخطار بس زي ما قال قانون التراخيص الصناعية اللي وافق عليه مجلس النواب الأسبوع اللي فات ، يعني الدولة بتقصر على المستثمرين اللف والدوران وبتسهل عليهم على قد ما تقدر.
وكل اللي بتعمله الحكومة ده عشان عاوزة ترفع معدل نمو الإنتاج الصناعي في مصر إلى 8 % خلال 3 سنين، وترفع مساهمته في الناتج الإجمالي المحلي لمصر بنسبة 21% بدل النسبة الحالية واللي متتعداش 17.7%، وكمان عشان تزود حجم الصادرات المصرية بحوالي 10 % كل سنة وتقلل عجز الميزان التجاري اللي هو الفرق بين صادراتنا وواردتنا بنسبة 50 %.
