مافيش حد عنده عربية مبيقعدش يحسب أمتي ميعاد صيانة العربية وهتأخد منه قد أيه وأسعار قطع الغيار كام وخصوصا أن الفترة اللي فاتت الأسعار ولعت ، وعشان أكتر حاجة بتستهلك في السيارة الكاوتش وخصوصا في مصر وبما أن أسعارها مولعة لأن أغلبها إستيراد الحكومة قررت تفاجيء المصريين، طيب أزاي”؟.

قبل ما أكلمك عن اللي عملته الحكومة لازم تعرف شوية أرقام عن إستيرادنا من قطع غيار السيارات واللي بتوصل إلى 3 مليار دولار سنويا، ده غير ملايين الدولارات بيتم إستيراد كاوتشات السيارات بيها من برا ، والرقم ده كبير جدا على إستيراد سلعة من أبسط السلع اللي ممكن تتصنع في مصر، وعشان كده الحكومة بالتعاون من القطاع الخاص بدأت من حوالي ستنين تعمل أكبر مصنع لإطارات السيارات في مصر ببورسعيد، وهيتم افتتاحه خلال أيام.

ومحافظ بور سعيد قال  أن المصنع يعد الأول من نوعه فى الشرق الأوسط، وأنه هيعمل على توفير العملة الصعبة من خلال الحد من استيراد الإطارات، كما أنه سيتم تصدير إنتاجه للخارج ، وغير كده وزارة قطاع الأعمال شغالة دلوقتي أنها تطور شركة النقل والهندسة واللي تعتبر الشركة الحكومية الوحيدة اللي بتصنع إطارات السيارات ، والتطوير هيتكلف 350 مليون دولار.

وصناعة زي ديه في مصر هتبقي من أكتر الصناعات المربحة لأن أحنا عندنا حوالي 8.6 مليون مركبة مرخصة في مصر، ده غير أن سنويا فيه أكتر من 100 ألف عربية جديدة بتتباع يعني الأرقام المعلنة ديه بتزيد كل سنة وبالتالي هنحتاج إستثمارات أكتر عشان نعرف نغطي إحتياجتنا وكمان ممكن نفكر في التصدير.

وكل اللي بتعمله الحكومة ده عشان تقلل الإستيراد واللي بياخد حوالي 60 مليار دولار من فلوسنا كل سنة وده تقريبا السبب الأكبر اللي بيدمر الجنيه وبيخلي قيمته ضعيفة قدام الدولار ، ولازم تكون عارف أن كل ما الإستيراد هيقل الضغط على الدولار هيقل وبالتالي سعره هينزل قدام الجنيه وهيرجعله قيمته تاني وكل ده معناه حاجة واحدة وهو أن أسعار السلع هتنزل جدا الفترة اللي جاية لو الحكومة كملت في اللي بتعمله.

إقرأ أيضًا

أرخص 10 سيارات مستعملة في مصر